ಬೆಂಗಳೂರು, ಅ.9: ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಡಿಜಿಟಲ್ ಇಂಡಿಯಾ ಭಾಷಿಣಿ ವಿಭಾಗವು, ರಾಜ್ಯ ಸರ್ಕಾರದ ಮಾಹಿತಿ ತಂತ್ರಜ್ಞಾನ ಇಲಾಖೆಯ ಸಹಯೋಗದಲ್ಲಿ ಬೆಂಗಳೂರಿನಲ್ಲಿ 'ಭಾಷಿಣಿ ರಾಜ್ಯಂ ಕಾರ್ಯಾಗಾರ – ಕರ್ನಾಟಕ ಅಧ್ಯಾಯ'ವನ್ನು ಆಯೋಜಿಸಿತ್ತು. ಡಿಜಿಟಲ್ ಆಡಳಿತ ಬಲಪಡಿಸುವಲ್ಲಿ ಮತ್ತು ಸಾರ್ವಜನಿಕ ಸೇವೆಗಳನ್ನು ಜನರಿಗೆ ಸುಲಭವಾಗಿ ತಲುಪಿಸುವಲ್ಲಿ ಬಹುಭಾಷಾ ಎಐ ಪಾತ್ರದ ಕುರಿತು ಕಾರ್ಯಾಗಾರದಲ್ಲಿ ಚರ್ಚೆ ನಡೆಯಿತು. ಗೃಹ, ಇ-ಆಡಳಿತ ಮತ್ತು ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಮಾತನಾಡಿ, "ಕರ್ನಾಟಕದಲ್ಲಿ ಪ್ರಾಂತ್ಯದಿಂದ ಪ್ರಾಂತ್ಯಕ್ಕೆ ಭಾಷಿಕ ಮತ್ತು ಸಾಂಸ್ಕೃತಿಕ ವೈವಿಧ್ಯ ಬದಲಾಗುತ್ತದೆ. ಜನರಿಗೆ ಆರಾಮದಾಯಕವಾದ ಭಾಷೆಯಲ್ಲಿ ಡಿಜಿಟಲ್ ಸೇವೆ ಒದಗಿಸಲು ತಂತ್ರಜ್ಞಾನಕ್ಕೆ ಇದು ದೊಡ್ಡ ಅವಕಾಶ" ಎಂದರು. ಹಾಗೂ ಮುಂಬರುವ ಬೆಂಗಳೂರು ಟೆಕ್ ಫೆಸ್ಟ್‌ನಲ್ಲಿ ಭಾಗವಹಿಸಿ ಭಾಷಿಣಿಯ ಸಾಮರ್ಥ್ಯ ಪ್ರದರ್ಶಿಸುವಂತೆ ಭಾಷಿಣಿ ತಂಡವನ್ನು ಆಹ್ವಾನಿಸಿರುವುದಾಗಿಯೂ ತಿಳಿಸಿದರು. ಪ್ರಜಾ ಸೇವಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಹರ್ಷ್ ಗುಪ್ತಾ, ಇಡಿಸಿಎಸ್ ನಿರ್ದೇಶಕ ಹರ್ಷಲ್ ಭೋಯರ್ ನಾರಾಯಣರಾವ್ ಹಾಗೂ ಭಾಷಿಣಿ ವಿಭಾಗದ ಸಿಇಒ ಅಮಿತಾಭ್ ನಾಗ್ ಮಾತನಾಡಿದರು. ಬಹುಭಾಷಾ ತಂತ್ರಜ್ಞಾನದಿಂದ ಸರ್ಕಾರಿ ಸೇವೆಗಳು ನಾಗರಿಕರಿಗೆ ಹೆಚ್ಚು ಸುಲಭವಾಗಿ ಲಭ್ಯವಾಗಲಿವೆ ಎಂದು ಅವರು ಅಭಿಪ್ರಾಯಪಟ್ಟರು. ಕಾರ್ಯಾಗಾರದಲ್ಲಿ ಭಾಷಿಣಿಯ ಸೇವೆಗಳಾದ ಬಹುಭಾಷಾ ಅನುವಾದ, ಟ್ರಾನ್ಸ್‌ಕ್ರಿಪ್ಷನ್, ಸ್ಪೀಚ್-ಟು-ಸ್ಪೀಚ್ ಮತ್ತು ವೀಡಿಯೊ ಅನುವಾದದ ಬಗ್ಗೆ ಮಾಹಿತಿ ನೀಡಲಾಯಿತು. ಶಿಕ್ಷಣ, ಬ್ಯಾಂಕಿಂಗ್, ಆರೋಗ್ಯ, ಕಾನೂನು, ಕುಂದುಕೊರತೆ ನಿವಾರಣೆ ಮುಂತಾದ ಕ್ಷೇತ್ರಗಳಲ್ಲಿ ಭಾಷಾ ತಂತ್ರಜ್ಞಾನ ಬಳಕೆಯ ಉದಾಹರಣೆಗಳನ್ನು ಪ್ರದರ್ಶಿಸಲಾಯಿತು. ಡೆವಲಪರ್‌ಗಳು, ಸಂಶೋಧಕರು ಮತ್ತು ಸ್ಟಾರ್ಟ್‌ಅಪ್‌ಗಳಿಗೆ ಇರುವ ಅವಕಾಶಗಳು, ಭಾಷಾದಾನ್ ಮತ್ತು ಭಾಷಿಣಿ ಉತ್ಸವದ ಬಗ್ಗೆಯೂ ಸಭೆಯಲ್ಲಿ ಚರ್ಚೆ ನಡೆಯಿತು.